Thiamthil neih

 

Thiam thil neih

-Vanlalromawia

        Tunlai khawvel kan thlir chuan thiam thil nei lo tan din khawchhuahna hun tha a awm lo tih theih a ni. Chutiang khawvel a kan chen tawh si avangin kan kawng kan thlan thiam a tul hle. Pawl 12 result te an chhuak a, thenkhat chuan kan kalna lam tur kan thlang fel tawhin a rinawm; thlang fello eng emaw zat kan la awm bawk awm e. Sawrkar hna in min daih vek seng lova, a tam zawk hi chuan sawrkar hna thawk kher lova ei leh bar kan zawn a tul reng a ni. Pathianin mihring a theihna a dah hi kan haichhuah thiam chuan eizawnna tlakah kan chhuah thin a lo ni.  

        Sawrkar laipuiin a ngaih pawimawh em em thiam thil nei tura in chher ( skill development ) lamah hian kan rilru kan pek thiam a pawimawh tawh hle. BA leh MA satliah kan tam ta lutuk mai te, thiam bik leh chhawrna tur awm lo certificate nei fer fur kan tam ta lutuk te hi kan in enfiah a tul tawh khawp lo maw?

        Zirna lama tui teh vak lo, mi aia chunga awm ngai lem lo, exam-na a ti tha lem vak ngai lo nih phei chuan “Degree nei tura beih ve vak vak hian enge maw sawtna a neih le?” ka ti thin. Pawl 12 atanga Training theih thiam thil zirna tamtak a awm a, chungte chu Master turin theihtawpin zir ta thung ila, MA nei tura kan zir zat kum zet kan zir chuan a chhenfakawm zawk daih lo’ng maw?

        Kan vannei a siamin keini veng zawng kan veng hming put chhan atang ringawt pawn kawng tam takah thiam thil zir tur a awm nghal pang mai a. Mi tamtak eizawnna tur siam sak tawhtu an ni a. Ti tak tak a zir tan zir thiam tur ava han tam em.

        Thalaite hian luck nih kan chak thin. Tunlai a luck ber chu Thing Mistiri ( Carpenter) te an ni an ti. Tuman duh huna chhawr tur an hmu ngai lo, chhawrtu tur an in dawt zut an ti nia mawle. An hlawh lah chu an thawh fuh tum chuan thlakhatah High Sikul Zirtirtu senior aiin an hlawh chhuak tha daih zawk leh nghal. Chutiang chu ITI ah a training theih reng alom. Hna hnuaihnungah kan ngai pawh a ni maithei, Pay scale in ang rau rau-ah a zirna senso leh kum chhung a in thlau rem rem em. Political fitness ngai ve si lo, eng certificate mah ngai lo hian chhungkaw hrawk a va chawm theih em.

        Kan vengchhung chauh lo pawh thlir ila, food processing hmanga india ram entrepreneurship award dawng pha te pawh mizo zingah kan nei thei a. GST practitioner ; mi sumdawnna tax va pek sak hmanga ei zawng te, Event planner ; mi birthday leh inneih hun hmanna tur chei bawl thinte, Pangpar khawi ringawta eizawngte, thlala a ei zawngte, stationary & Printing lama eizawngte, Thlalai tamtakin kan in tihhmuh ‘Dine-Out’ na hmun tur leh ei tur siam thinte, birthday cake siam thinte leh thil dang tamtak kan hmu thei ang. Heng ho hi hna zahawm tak tak vek sawrkar hna ni si lo, an mahni line theuh a eizawnna tlak thiau a ni awm e. Taima taka thawk tan thawh sen loh hna awmna vek a ni.

        “Mahni tui zawng thawkte hi khawvel a mi vannei ber te an ni” an lo ti thin. Hna thawkah an in ngai lova hlim takin an phur zawng tak thilin ei an zawng zawk thin. Kan tuina zawn theuha kan thawh hian thil ropui kan lo ti thei zawk thin.

        Kan Talent Pathianin a min pek hi kan haichhuah thiam a pawimawh. Tunah kan la hre mai lo a nih pawhin; kan samzai zat nen lama min hrechiangtu kan Pathian hnenah thlen ila, a nin a kawng min ruat sakah chuan kan tuina zawn chu kan hmu ngei ang. “Engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se.” Phil 4:6 . Kan duhte, kan hma hun turte, kan eizawnna turte, kan rawngbawlna turte, kan engkim hi Pathian hnenah thlen ila. Te lua awm lovin engkim a hnenah tawngtaiin kan thlen chuan, Anin kan thatna turin a lo rel zawk thin.