Het Shalla!!!

 

Het Shalla!!!

-Vanlalromawia

             Tum khat chu project la zawh chiah loh a tuka thehluh tur hi ka nei a, Pathian ni a nih avang chuan inkhawm ve hram ka duh bawk si a, ka va inkhawm ta a. Tlai kan bang chu eng dang ti khawmuang lo chuan ka haw tlang ta mai a. Metro ah darkar khat zenzawn ka chuan hnu chuan kan PG pawh chu ka thleng ve ta a. Mizo dang ka bul hnai vai ah an awm ve loh avang hian vai kawm ngawt ai chuan ka phone hi ka kawm tam zawk mah a, hemi zan pawh hian ka phone kawm tui ltk chuan ka tih tur poh ka lo hrechang tawh lo niin, sana kan en chu dar 12 a lo ri der tawh mai. Ka tihtur chu tlai hnuhnawh ah kan ti tan ta a. Ka zawh meuh chuan zing dar 3 a lo ri der tawh. Ngaih tha tak chuan ka mu ta a.

             A tuk zing a lo in her chhuak a buai a in tan. Ka roommate vaipa a hma zanin alo mu thei reng reng lo chu niin. Thawh veleh atangin min han an khum tak tak a. Kei lahin engah vak mah ngai lo chuan ka tih tur ang ang ka tih san hmiah hmiah a. Class kal tura ka kal chu min rawn um zui a, gate ka chhuak tur chiah chu ka thin khei zawng takin min han tawngkhum ta siah mai. Ka ding chawt a, “Het Shalla! Vai chhia te te in khatianga min han tih chu le…” Ka kut tum chu ka hum ruh khop mai. Ka sa phat a, thisen zam rawn pawng nghal awt awt khawpin taksa a rawn lum phat mai bawk a. 

              Rik nghal rum rum mai kha ka chak lutuk a. Mahse ka sana kan en a, a lo tlai tawh sia, project submit tur ka nei bawk si nen, engmah pawh sawi ta lo chuan ka kaltlang ta zawk a. Nileng mai hian ka rilru ah a cham a, ‘vai tete si; khatianga min ti kha ka ngaidam dawn lo reng reng’ ka ti rilru neuh neuh a.

             Chutia ka in ngaihtuah lai chuan Bible a ka chang duh deuh hian ka rilru a rawn luah ta tlat a, “In dawhtheih zia mi zawng zawng hriat ni rawh se.” (Phil 4:4) ‘Mi zawng zawng a tih ah hian vai pawh an tel ve a sin’ tih hi riruah a rawn lang nghal a. Chu thu ngaihtuah chung chuan ka haw ta a. Zing lama ka thinrim pawh a lo dai deuh tawh a. Ka inthlahdah avanga a hma zana meng rei ta ka nih ka inhre thar leh a, thiamthu sawi tur reng ka lo nei lo zawk hi a lo nia. Zing lama ka thinrim lai khan ri nghal buai ila chu, a buai zawk; thiamthu sawi tur nei lo zawk ka lo ni dawn reng si a. Ka ri nghal buai lo pawh kha a tha ka ti letling leh ta zawk a.

             Chuta tang chuan ti hian ka ngaihtuah ta a. Dawhtheihna hi Kristiante nun laimu ber a lo nih hi mawle, Bible a mi entawn tlak tak tak kan hmuhte pawh hi han zir chian chuan mi dawhthei tak an lo ni zel mai te, Kristian nun leh thinchhiat a inmil loh zia te min ti hrechhuak a. Thil sawisel tur hre deuh te, phunna tur leh an na tur hre deuh te hi mi dawhthei an ni ngai lo. Thinrim insum kar lo taka ri nghal bawrh bawrh mai chi te, Kristian nun nen alo inmil tawp lo mai.

             ‘…Mi zawng zawng hriat ni rawh se…’ a in tih si chuan kan chhungte, kan thiante, kan ringtu puite mai bakah; vai leh hnamdang ringlo tute chungah pawh kan dawhtheih zia lantir hi kan tih makmawh chu a lo ni. “Engpawh ni se, in awmdan chu Krista Chanchintha nen inmawi phawt rawh se”(Phil 1:27)- a kan hmuh angin Krista Chanchintha nena inmil tak dawhtheihna hi kan bul ami te, mi zawng zawng hriat atan vawn nun tlat i tum zel ang u.

             Dawhtheihna hi mahni in phah hniamna, tlawmna nun a ni a. ‘Tlawm zawka tan zul zul zawng, apa lo emai’ i lo ti a ni maithei. Mi dawhthei nih hi pa lohna a nih ngai chuan ; pa deuh a kan kumhlun lohna tur he khawvela lo in lak vung vak ai chuan, Pa loh ngam te pawh chu a that phian ka ring. Kumsang rorel ni ah an pa tlang thei awm bik silova.