To be or not to be an interior designer
|
-Vanlalromawia, Interior Designer
Mihring kan awm chhung chuan kan chenna tur in kan sak a ngai thin a, damchhung rei lo te ah hian kan khawsak nawmna tur ngaihtuahin neih thinglung khawngin kan chenna tur kan buatsaih thin a ni a. Ruhmanna mumal kan neih loh thin vang leh kan hriat a tlem thin avang hian kan neih zawng zawnga kan sakte pawh a tawpah lungawi lo deuhin kan luah a ngai thin; Kan lo suangtuah dana a chhuah loh thin avangin. Chutah tak chuan Interior Designer te an pawimawh thin, ruahman lawk sak tur che in.
Interior Designer te hi eng ang takin nge an pawimawh? Khawvel changkang chho zelah mizo te pawn khua kan lo hawi zau ta hle a, thil tha leh in chhung nalh tak takte kan hmu in; neih ve te kan chak thin. Chutianga kan duhthusam ti puitling tur chuan Interior Designer ten rawih an hlawh chho mek zel a, an pawimawh chho tawlh tawlh dawn ti ila kan sawi sual lovang. Mihring ten kan hun hman 80% bawr vel hi inchhungah kan hmang thin a. Kan in, Office, School, College, Restaurant, Mall, etc... ah te; kan khawsak ti nuam tur leh kan nitin nun ti nuam turin a chhung felfai taka duan an mamawh a, chutiang ti tur chuan Interior Designer te hi an pawimawh em em a ni.
Interior designer chuan enge an tih ber? Mi thenkhat ngaihdan chuan
‘inchhung a lan mawina tura cheitu te hi Interior Designer chu an ni mai’ ti an
awm a. Chutiang chauh chu he hna in a tum chu a ni lo. Ni, inchhung a lan
mawina tura ngaihtuah chu a hna pengkhat chu a ni teh meuh mai, chumai bakah
chuan inchhung chu a chen a nawmna turin thil hrang hrang ngaihtuah tel ngai
tamtak a awm a, hmun chep leh kilkhawr pawh hmang tangkai thiam tura lo riruat
lawk thiamte a ngai a, chet nuam tur tawka hmun awl zuah thiam te, a chhunga
chengte hriselna tur ngaihtuah chung ran a ruahmanna siam thiam nih te a ngai
thin. Insakna hmanrua hardware chi hrang hrangte, rawngte, furniture-te, light
fixtures, plumbing leh a fit dan zawng zawng nen interior designer tha chuan a
hre hneh hle tur a ni.
Engtin nge Interior Designer chu i nih theih ang? Ram dangte ang lovin India ramah chuan Course zir zawh a, Certificate rintlak tak neih chuan interior designer a ni nghal theih. Ram dangah erawh professional a practice tur chuan exam paltlang ngai a awm thung.
Course hi chi hrang hrang a awm a, a institution a zirin, a nawlpuiin Diploma leh Bachelor Degree course te an pe tlangpui. Class 12 pass hnuah a zir theih a, entrance pek ngai lovin Private institution ho ah chuan a luh nghal mai theih. Course fee hi institution hrang hrangah a in ang lo nuai a, a tlawm berah kum 1 ah nuai khat leh sing nga vel bawrah a chawhrual theih ang. Institution thenkhatah erawh a aia sang te pawn a awm.
India ram chhunga Interior Designing course zirna thazual Freshersworld,com in a tarlan dan chu
· National Institutes of Design
· Pearl Academy, New Delhi
· Vogue Institute of Fashion Technology, Bengaluru
· IIT Bombay
· Sai School of Interior Design, New Delhi
Heng bakah hian zirna rintlak tamtak a la awm a, institution te nau fee tlawm zawk a zirna tha tak tak pe an awm bawk. Institution tam takin Fashion Designing Course nen a ti kawp thin a, Interior Designing course chauh pe an awm bawk, kei chuan fashion nena kawp lo institution hi ka duh mah zawk. Hmeichhe tan Delhi ah chuan Polytechnic for Women – te pawh hi a tha, mizo zingah pawh zirchhuak an awm nual tawh mai. Harsatna pakhat awm thei chu Private institution tam zawkah hian Hindi in Lecture an pe thin, a bik takin Delhi leh a chhehvel north india lampang institution ah te a hluar zual.
Interior Designer lo ni ta ila enge ka thawh theih?
Working in Private Firm : Company hnuai a thawh a ni mai a. Mizoram pawn lamah chuan designing company thawhna tur tam tak a awm a, hna hmuh pawh a har lem lo. Mizoram chhungah pawh construction company a awm nual tawha, chunga thawk tur chu an duh reng bawk.
Freelancer : Mahni a thawkin a ruaitu te nen a in remsiamin, a rate tur zat pawh inbiakremna a kalpui a ni thin. Carpenter, plumber, electrician leh cement mistiri te nen inzuiin an thawk ho thin. Mizoram a kan interior Designer te thawh dan tlangpui a la ni rih.
Designing firm : Company din kan tih mai, hnathawktu dang chhawrin hna lian zawk leh tam zawk thawk thei tura company firm din te pawh a theih.
Product Designer : Production kan tih hian furniture hrang hrang siam chhuah a huam thei a, mizo ten kan hriatthiam dan tur chuan furniture workshop neih a ni deuh ber mai. Mizoramah furniture siam sa lei tur a van zia leh chi hrang thlan tur a awm loh zia kan hre theuh a. Mizoram chhung mai ni lo ram pawn a thawn chhuah theih tur khop kan siam chhuak ve thei, chumi tur chuan product designer angin sumdawnna a tan theih bawk.
Color Counsultant : Rawng
thlan chungchanga thurawn petu a nih theih bawk a. Mizo ten hetiang hna hi la
hmelhriat lutuk lo mah ila, ram dangah chuan an ngai pawimawh hle. Colour hian
kan rilru sukthlek a nghawng tel vek avangin.
Heng bak pawh hi hna tamtak thawh tur a la awm thei ang. Interior Designing hi art chi khat a nih avangin certificate neih that leh that lohvin kawng ro a su em em lova. Lemziak thiam ten an lemziah thiam zia certificate in a hmuh ngai lova, an thil ziah atangin an thiam zia a chiang mai ang hian; Certificate neih that avangin khawi company mahin an chhawr dawn lo che a, i portfolio; i thil lo siam tawh hmangin an buk ang che. Article pakhat a sawi vek sen a ni lova, hriat belh duh leh zawh belh duh kan nei a nih chuan facebook page leh instagram lamah Mizo_Interior_Design ah engtik lai pawn i rawn zawt dawn nia.
Comments
Post a Comment