Thalaite Tana Hnaruak

Thalaite Tana Hnaruak

-Vanlalromawia, ITI Vengchhak Branch

Mi tupawhin kan duh ber chu nuam taka awm theih a ni awm e. Chumi tur chuan thil ken tel tamtak a awm a, chung zingah chuan thawhrimna hi thil pawimawh tak a ni. Ram changkang a chengte nun dante kan hmu thin a, chutianga awm ve te, changkang taka nun hman ve te kan thlahlel tlang vek awm e. Mahni intodelh ram apiang an nun a nuamin a awhawm thin. Chumi thleng tur erawh chuan kan hna leh thil tih tinrengah taima taka kan tih a ngai thin.

            Tun hnaiah Cable TV lamah program tha tak tak te kan hmu chho zela, thalai enzawnna bul tan duh te tana tanpuina kawng hrang hrang a in hawng a, a lawmawm hle. Kan nu leh pa te hunah kha chuan Sawrkar hna a la tam a, chumi mil chuan kan nu leh pa ten lehkha min zirtir a, Batch khat ah a thiam filawr nih loh chuan sawrkar hna te pawh beisei ve chi pawh a ni lo. Sawrkar hnathawh vek tum hian kan ram economy a chawisang har viau bawkin a rinawm. Sawrkar hna in min daih tawh si loh chuan thalaite hian eng nge kan thawh ve tak ang le?

            Hna hrang hrang zingah thing mistiri (Carpenter) hna hi lo thlur bing ta ila. Theka vekin an thawk tawh a, MDF Board (Duratuff kan tih mai) phek 1 (square Feet 32)  hmanga inchhung bungrua an siam a; rawng an kah thlap hian rate tlanglawn berin Square Feet ah ₹150 x 32 = ₹4800 an hlawh a. Thlakhat chhungin MDF Board 30 hmangin wardrobe emaw, Kithchen cabinet lo siam zo thei ta ang sela. Phek 30 x ₹4800 = ₹1,44,000 an lo la lut thei a. Helper hlawhah ni 25 x ₹500 = ₹12,500. Mistiri Junior deuh pawh lo chhawr tel ta pawh nise ni 25 x ₹800 = ₹20,000. Helper 2 chhawrin, mistiri junior deuh 1 nen an chhun ei leh in ₹8000 ang vel pawh lo paih sak ta ila , head mistiri in a la chan tur chu ₹91,000 daih a la ni. Sawrkar hnathawk tamtak aiin an hlawh a tam zawk. Chuti pawn a thiam deuh chuan hna thawh sen loh an la hmu reng chu a nih hi. Heng te hi inzir thiam theih a ni, helper kumhlun nih tum lo ila. Graduate kan nih avangin kuthnathawh kan zak dawn em ni? Private School a thawh aiin a hlawk.

            Kan nu leh pa te chuan sawrkar hna eng emaw kan thawh loh chuan hna hmu ah min ngai lo. An hun lai leh kan hun lai erawh a in ang thei tawh lo. Mithiam bik sawrkar hna sang leh exam a in ziak tling te chu an awm ang. Lehkha kan zirlai te han ngaihtuah let ila kan class-ah pakhatna mi 10 an awm ngai lo. Chuvangin a tam zawk hi chuan sawrkar hna kan hmu dawn lo. Mahni ke a ding thei tura thiam thil kan neih a tul.

            Insakna lam hna ah ringawt pawh Cement Mistiri, Plumbing, Welding, Electrician, False Ceiling siam, Tile phah, Wall Putty leh rawng hnawih, Carpentry work-ah te thawh tur a awm. Hna thawh tur chu a la tam ngang mai; a thawktu ten taima tak leh tihtakzet a kan tih a ngai thung. Chu chuan kan economy a chawi kang ang nga kan ram hi ram nuam leh awhawm ah kan siam thei thuai ang.

            Delivery service-te hi a tha khop mai, Dawr leh Restaurant te nena thawk ho in eizawnna tha tak a ni. Hmeichhe lam pawn thawh theih tamtak kan nei awm e; Eiturte siam ila Zomato leh a dang te thawhpui in mahni in atangin sumdawnna tha tak a tih theih. Pangpar khawi thiam leh Inkhawmpui ni khua a Hall leh a chhehvel nalh tak tak a chei thin te tan Birthday, Wedding, Pass lawm leh thil hrang hrang; event management lam te han zir zeuh ila eizawnna tha tak a ni. Craft lam tui mi leh thiam ho tan pawh Man eina, Inneih sawmna, Gift bag, Pinata leh thil dang tamtak mahni awmhmun atangin siam ila, social media velah in phochhuak ila, tih tak zeta kan tih chuan order chu a rawn lut ve zut zut mai ang.

“I kut thawhrim rah chu i ei dawn si a; Lawm takin i awm ang a, thawvengin i awm bawk ang.” Sam 128:2-a kan hmuh angin he leia kan awm chhung la la hian kan kut thawhrimna hi a rah kan tel tur thu min hrilh. KTP memberte hi hnathawh neilo in kan lo la awm reng a nge, thiam thil neih ve tum ila, chu chu tihtakzet a kan thawh chuan mahni tan hna kan insiam mai bakah mi dangte pawh kan chhawr chhawng thei hial ang.  Kan thiamna leh theihna zawn theuhah tihtur kan neih ve hi i hre thar leh ang u.

(Kristian Thalai November 2021)